【香港印象】井中承傳的溫馨 水玉陶瓷杯墊

__產品故事__ 每逢新年中秋，周圍都會見到燈籠，尤其中秋節。以前就算未到正日，一入夜，樹上面、欄杆邊都會掛滿燈籠，可惜依家嘅小朋友大概寧願篤ipad都唔玩燈籠蠟燭嚕，曾經美麗嘅畫面漸漸褪色。不過近年喺荃灣某角落，竟然出現復刻，仲慢慢變成期間限定嘅景點𠻹！ 半山腰上嘅中秋，幾年前起變得好溫暖，唔係溫室效應，而係井中住咗個暖男老公！話説某年月餅節，兩公婆返屋企時、老婆見到樓上掛咗串燈籠好靚就影相打卡，老公就話嘞：妳覺得好靚？以前細個都係咁玩㗎啦，係依家冇咋嘛，明年整返以前咁畀妳睇吓嘞！冇以為佢下巴輕輕喎，a promise is a promise，第二年老公真係同一班街坊夾手夾腳起咗個燈籠陣！過百個燈籠，穿越井型大廈嘅半空、橫跨幾個樓層，重塑經典嘅景致，亦慢慢吸引到邨民甚至邨外人嚟欣賞，更加令象山從此成為中秋hot search。 一直好鍾意井型屋邨大廈，除咗夠獨特同iconic，或者更因為佢嘅開揚，就好似燈籠陣咁，樓上樓下、一個連一個，鄰里社區嘅連結曾經就係咁形成，仲會喺井內出現一份獨有凝聚力。時代蜕變，樓宇變得更先進，同時亦變得更封閉，不相往來成為鄰里默契，正如消失嘅燈籠陣，或者就嚟消失嘅互協會，社區好似唔再需要連結咁。然後突如其來嘅疫症，強檢又令大家we connect埋一齊，不禁令人諗，如果昔日社區守望相助嘅連繫仲存在，突然圍封嘅日子，會唔會都冇咁難捱呢？ 或者我哋擁有過最好，或者我哋失去得最多嘅就係信任，希望終有一次月圓，我哋可以好似燈籠嘅光咁，重新連繫埋一齊，重塑屬於我哋嘅溫馨。 __材料：__ 鶯歌陶瓷 __尺寸：__ 9.5cm x 9.5cm （圓角） 香港設計 、 台灣製造 **螢幕與實體商品可能會有色差，請以收到商品實際顏色為準。**